Act 8 | NAS | STEP | Eeꞌnoko Sooloi tee tampaꞌ noruꞌuuꞌ teeꞌ Sitiveni booꞌparuꞌnaꞌ. Eeꞌnoko teꞌmung-eta deto aaꞌnaꞌ orakaꞌ nkoaaruꞌnung teing dootuuꞌnupoong teka Jerusalemaꞌka, eeꞌnoko teing teketa purarenkaꞌeuꞌ avitoitoi aaꞌning-koo Judiaꞌ eeꞌnoko Sameriaꞌnameensiꞌkoo, nka teing kara okovuri nkanuka tenkenaavaꞌ.

Acts 8

Sooloi Karistooꞌnavitu Orakaꞌ Nkovurikoꞌnaꞌ

1 Eeꞌnoko Sooloi tee tampaꞌ noruꞌuuꞌ teeꞌ Sitiveni booꞌparuꞌnaꞌ. Eeꞌnoko teꞌmung-eta deto aaꞌnaꞌ orakaꞌ nkoaaruꞌnung teing dootuuꞌnupoong teka Jerusalemaꞌka, eeꞌnoko teing teketa purarenkaꞌeuꞌ avitoitoi aaꞌning-koo Judiaꞌ eeꞌnoko Sameriaꞌnameensiꞌkoo, nka teing kara okovuri nkanuka tenkenaavaꞌ. 2 Teka niiꞌninge Kumponing-koo meeꞌduꞌpiariri otorokoꞌninge dakoꞌauꞌ tee Sitiveni aaꞌnaꞌ birompaama. 3 Teka teie Sooloi tee tooreerevurikoꞌ teing dootuuꞌnupoong pava kantevui tumparama bera donkaang eeꞌnoko maniiꞌ barampurima kiimatanava-koo sipurikoꞌ.

Kara Okovuri Nkanukai Judiaꞌ Eeꞌnoko Sameriaꞌnavoraꞌkai Dooreaaruꞌnaꞌ

(8:4–12:25)

Pilipiꞌ Bera Sameriaꞌnupoong-koo Daankiaruꞌnaꞌ

4 Enang tee teing purarenkaꞌariruꞌning avitoitoi nanaama Kumponing bakaang kara daankiauꞌ. 5 Pilipiꞌ tee Sameriaꞌ osi pankaing-koo beuꞌ eeꞌnoko teing-koo daankiarama aaꞌpuuꞌ, “Jiisuuꞌ tee naning Kumponinge tero Pakoꞌpariꞌuuꞌnung~ nantoong domampuri tarevuriainooꞌkoo.” 6 Eeꞌnoko tenang karingai tee taaravaara eeꞌnoko ooaama taaꞌniꞌantananka teie nkovukoꞌning domang-eta baroromparikoꞌ Pilipiꞌke minkuvukoꞌning-koo. 7 Aiꞌ nantoong mmauꞌ maꞌnarie orenge koriaarikoꞌning unaavorokoꞌ tenang maꞌnari uiarima taapoꞌ teing-eta bakoariko, eeꞌnoko nantoong karinga dootananka eeꞌnoko kaikuuꞌnanka unaavorokoꞌ. 8 Bera tee temono-nupoong aaꞌnaꞌ dotuarikoꞌnung.

9 Teka teke osi pankamono-koo tee naning miring Saimoniꞌ aaꞌnaꞌ biivimparama otokoꞌnung maꞌnari biikaang iriꞌke taꞌnimpaariiꞌ nkovuma. 10 Pankaroong bakaang bankinie aavavuriko bera teinge Sameriaꞌnupoonge asikovurima siompaakoꞌ; 11 Eeꞌnoko teinge ookarai temono-koo otorokoꞌninge eeꞌnoko biikaning ovontunankai tee narung barorompaakoꞌ aaꞌpaama, “Aung naning niiꞌnara Kumponing piikonara deto basi.” 12 Teka tenang Pilipiꞌke doorenang tampara daankivuuꞌ Kumponing bakaang muuꞌkoong eeꞌnoko tee muuꞌ tarevuaing Kumponinge tero Pakoꞌpariꞌuuꞌnung tee miring Jiisuuꞌ. Teinge tee taaravaara ookara, donkaang eeꞌnoko maniiꞌ masikaꞌantavaara ntong-koo minkiarira meekaꞌantavariruꞌ. 13 Tee Saimoniꞌ eeꞌnara bereꞌarara nariꞌ masikaꞌantavauꞌ, eeꞌnoko damaꞌke ntong-koo minkiarara meekaꞌantavarara Pilipiꞌ ninka nariꞌ nanurekoꞌ, bera taaꞌniꞌantananka eeꞌnoko nko-nko taꞌnimpaariiꞌnanka oovuma asikovukoꞌ.

14 Enang tee kara okovuri nkanukai Jerusalemaꞌketa eeꞌ taaravauꞌ, “Sameriaꞌnupoonge Kumponing bakaang kara taaravaing.” Eeꞌnoko teinge Piita naanka Jooni teꞌ botoaaretuꞌ. 15 Bera teꞌ poreta kunsiaaretuꞌ temono-nupoonge Tanuaang Meekung nkavaavaꞌnaang. 16 Aiꞌ teing ookara tee Tanuaang Meekunge mmeꞌ korivuriaꞌ, tamung ntong-koo minkiarira meekaꞌantavariruꞌning Jiisuuꞌ Ovoring bakaang miring-koo. 17 Bera tenang teing-koo tenaankai beekaang bireng panteꞌaaresioꞌ Tanuaang Meekung nkavauꞌ.

18 Enang Saimoniꞌke tee tenaankai kara-okovuresi-nkarai bireng panteꞌaareko Tanuaang Meekung nkavaako oovura, temuriiꞌ iriꞌ mooniꞌke mooꞌkoo piavouꞌ. 19 Eeꞌnoko bera aaꞌpuuꞌ, “Ning amereai tee temuriiꞌ iriꞌ, eeꞌnoko baa naning ninge nkaang tankaꞌ panteꞌampaing Tanuaang Meekung nkavuaing.” 20 Teka Piitai aaꞌpuuꞌ tee, “Tee ninka dakaang mooniꞌ ninka daꞌ nariꞌ paaꞌdaravaing eeꞌ noruꞌemaatomaung-koo Kumponing bakaang avuavuꞌ mooniꞌke pa mooꞌkoo makosi. 21 Daꞌ dakaang deeaꞌ aung eeꞌ oroꞌ kapooꞌ nko-koo, aiꞌ daꞌ dakaang domang tee koomparavaꞌ Kumponing-ankoi. 22 Kiimata-koo aroreitaaꞌ deekoꞌ bereꞌdaravai daꞌ teieta aung-eta dakaang onou orara-ita, eeꞌnoko kunsiraravai Ovoring-koo dakaning oreng tontaꞌderuainaꞌ baka makosivura deekoꞌ. 23 Aiꞌ daꞌ tee ninge mamairoi maantoꞌ ooramaang eeꞌnoko orakaꞌnkoi daiꞌdui otong.” 24 Eeꞌnoko Saimoniꞌke makuꞌuma aaꞌpuuꞌ, “Deeꞌ kunsirareaing Ovoring-koo teing kapooꞌnanka minkuveresining ning-koo basiaravaukaꞌnaꞌ.”

25 Eeꞌnoko tenaankai Jiisuuꞌ mintoomparako oovurekoꞌnaꞌ siraꞌpuresi nauaaretuꞌ teing Sameriaꞌnavuntuꞌkoo otorouꞌning, eeꞌnoko Ovoring bakaang kara daankivuretuꞌ. Teketa Jerusalemaꞌaape toroaretuꞌ daankivurema tee doorenang tampara osinanka mmauꞌkoo Sameriaꞌnameensiꞌkooning-koo.

Pilipiꞌke Naning Itiopiaꞌkoong Kuneꞌuuꞌnaꞌ

26 Teka narunge koosinunge~ Ovoring bakaange Pilipiꞌ aaꞌpuuꞌ, “Danto beaing tevung-koo taunavung Jerusalemaꞌketa Kasa-aape beꞌnavung-koo.” Tevung eeꞌnavung teke meeꞌboraꞌke nanuꞌnavung. 27 Eeꞌnoko tee iꞌamparara nanuma narung Itiopiaꞌkoong oovuuꞌ, naning pankaing, doꞌmaꞌniiꞌ, teni Kandesi, Itiopiaꞌnupoong biikanani ovorinaang bakaang mooniꞌ tarenara; 28 Eeꞌnara Jerusalemaꞌaape pouꞌ dootuuꞌaraaꞌnaang eeꞌnoko toroarakoꞌ teketaꞌ bakaang kaarisi-koo baꞌnanui deeruvuma nanukoꞌ Daari Meekung teie temuꞌnung nakaronarai Aisaiaꞌke daarivuuꞌnung. 29 Eeꞌnoko Tanuaang Meekunge Pilipiꞌ aaꞌpuuꞌ, “Deto bera kaarisi-ankoi dueꞌke nariꞌ naniai.” 30 Teketa Pilipiꞌ kuaꞌparuꞌ tee-anko eeꞌnoko teie tee temuꞌnung nakaronung Aisaiaꞌke daarivuuꞌnung deeruvuko taaravuuꞌ. Eeꞌnoko tee Itiopiaꞌkoong niaꞌuma aaꞌpuuꞌ, “Dake ee tee kapooꞌ deeruematomaung tasiꞌpemaang?”

31 Eeꞌnoko teie aaꞌpuuꞌ, “Arekeeꞌ ninge tasiꞌpampeuꞌ naninge pakumuaruko?” Eeꞌnoko Pilipiꞌ bokuvuuꞌ deto koinura tee-anko baꞌnanuuꞌnaang. 32 Tee kara Daari Meekung-koo deeruvukoꞌnaare anaare:

“Kumponing bakaang bautara dupisiꞌaavaꞌnaang nkoaako karang kamaankuaukaꞌnung teeꞌ nariꞌ sipisipiꞌnu amakoarapeuꞌnaꞌ nantoonge tavuꞌdoma barampai beroko.
33 “Teinge pooreꞌaama kara koontoꞌnaꞌ simpeꞌevaavaukaꞌ. Teing nantoong bakanavarang-kooning bakei aaꞌnupoong: tee bakaang domaang teie, kansiꞌketa koontoꞌ tontaꞌaavaing.”
(Aisaiaꞌ 53:7,8)

34 Eeꞌnoko teie Itiopiaꞌnunge Pilipiꞌ aaꞌpuuꞌ, “Ee aung, teie nakaronarai baa teeꞌ minkuvuuꞌ? Baka minkuaruꞌ aiꞌ niiꞌnung teeꞌ minkuvuuꞌ?” 35 Tenang eeꞌnang Pilipiꞌ karoma tenaare Daari Meekung-koong deeruvuuꞌnaare-ita tutumpuma tampara doorenang Jiisuuꞌ Karistooꞌkoong nauvuuꞌ. 36 Eeꞌnoko teketa nanurema taunge ntong-poꞌnooꞌ basiaretuꞌ. Eeꞌnoko teie Itiopiaꞌkoonge aaꞌpuuꞌ, “Ooveko ntong aung. Aminge avoꞌmupeuꞌ ning enang ntong-koo minkimarara meekaꞌanta-koo?” 37 Pilipiꞌke aaꞌpuuꞌ, “Tee aaꞌ kapooꞌ otoaꞌ, dakaang domang-eta koontoꞌ masikaꞌantaveing deekoꞌ.” Eeꞌnoko teie makuꞌuma aaꞌpuuꞌ, “Masikaꞌantavansi oꞌnong tee Jiisuuꞌ tee naning niiꞌ domamuri taremuriainooꞌkoo tero Pakoꞌpariꞌniiꞌ, Kumponing Bauring.”

38 Eeꞌnoko tee eeꞌnara botoaruꞌ tee bakaang kaarisi teꞌ datearaaꞌnaang, eeꞌnoko tenaanka ookaanka Pilipiꞌ eeꞌnoko tee Itiopiaꞌkoong doonko ntong-koo siareta Pilipiꞌke teka ntong-koo minkivura meekaꞌantavuuꞌ. 39 Eeꞌnoko tenang ntong-eta deto taapoꞌ poreko Tanuaang Meekunge Ovoring bakaange Pilipiꞌ namuꞌke deto batusiꞌuuꞌ, eeꞌnoko teie Itiopiaꞌkoonge napoꞌ kemuꞌkanaꞌ oovuaruuꞌ teka. Teketa dotuarama danto nanuuꞌ bakanooꞌaape. 40 Teketa Pilipiꞌ Asotasi-navuntuꞌkoo oroꞌparuꞌ, eeꞌnoko teke tankinuma ookara osi-koo tee doorenang tampara daankivuma nanuuꞌ bera Sisariaꞌ basiaruꞌ.